चौतर्फी आलोचना पछि इन्टरनेशनल इण्डियन फिल्म एकेडेमी (आईफा) अवार्ड आयोजना सरकारले आयोजना नगर्ने भएको छ । असार ८ गते मन्त्रिपरिषद बैठकबाट आईफा अवार्ड नेपालमा आयोजना गर्ने निर्णय गरे संगै उक्त अवार्डका लागि काठमाडौं महानगरपालिकाले ४४ करोड रुपैयाँ अनुदान दिने भनिएको थियो । सरकारले गर्ने खर्चको विषयलाई लिएर चौतर्फी आलोचना भैरहेको अवार्ड अब नेपालमा नहुने भएको हो ।
नेपाल पर्यटन बोर्डले यसवर्षको आईफा नेपालमा नहुने पुष्टि गरे । मंगलबार प्रतिनिधिसभाअन्तर्गतको अन्तर्राष्ट्रिय सम्बन्ध समितिको बैठकले नेपालको सांस्कृतिक स्वत्व र राष्ट्रिय हितमा प्रतिकूल असर पार्ने उद्देश्यबाट उक्त कार्यक्रम प्रेरित भएको भन्दै आइफा रोक्न निर्देशन दिएको थियो ।
आईफा फिर्ता हुने सरकारी निर्णयलाई कतिपयले गुठी विधेयकपछि फेरि एक पटक दुई तिहाईको सरकार सामाजिक सञ्जालसँग झुक्न वाध्य भएको अर्थमा व्याख्या गर्न थालेका छन् ।